ليه لازم نقرأ فى علم النفس

 

ليه لازم نقرأ فى علم النفس؟

علم النفس هو علم دراسة سلوكيات الانسان فى ضوء الانشطة التى نتج عنها هذه السلوكيات، وبالتالى هيساعدك تفهم سلوكياتك وسلوكيات اللى حوليك تجاهك بشكل اعمق ومع مرور الوقت هتزيد قدرتك على التحليل والنقد والتفكير المنطقى، تجاه السلوكيات التى تحدث معك بشكل يومى وبالتالى هيساعدك تكون ايجابى تجاه العلاقات فى العمل والاسرة والاصدقاء .

وده بيحدث من خلال  عدة محاور :

1-    فهم نفسك : اهم قيمة لعلم النفس ليس فقط مساعدتنا نفهم اللى حولينا وسلوكياتهم، ولكن بيساعدنا نفهم نفسنا ، مشاعرنا، افكارنا، ميولنا، وده هيسهل علينا اننا نكون متصالحين مع نفسنا بشكل كبير، وفاهمين اهدافنا وطموحتنا من اللى حولينا بشكل اكبر، وده بيساعد بشكل كبير انه ينجح العلاقة، فالشخص اللى مش متصالح مع نفسه كفاية او مش فاهم او مش عارف  يحدد هو محتاج ايه بالظبط  صعب يكون شريك حياة ناجح ، او طرف فى علاقة مستقرة، والتعامل معاه بيكون مرهق على الناس اللى بتحبه

2-    التفاهم : الشخص اللى فاهم نفسه وفاهم اللى حوليه بيعرف يخلق مساحة من التفاهم بينه وبين اللى بيحبه، فهمه لطبائع وشخصيات الناس وان كل شخص له لغة وطريقة تفكير مختلفة عن الثانى، بتخليه لما يرتبط يعرف من خلال تكرار العلاقات يكون لغة تفاهم مع المحيطين بيه، فعلى سبيل المثال امتى يسكت وامتى يتكلم !، وايه الموضوع اللى محتاج مناقشة ولو اتنقشنا فيه يبقى امتى وازاى ، وايه الموضوع اللى مش محتاج غير ملاحظة بسيطة ، وكل ما كان الطرفين عندهم نفس درجة التفاهم والاستيعاب كل ما كانت علاقتهم انجح ، وده بيجنبهم سوء التفاهم اللى بيحصل مع كثير من المرتبطين نتيجة الفهم الخاطئ اللى بيعتبر واحد من اخطر انهيار العلاقات اللى كانت جميلة وهادية.

3-    تحديد المشكلة : كثير بيكون فى ناس بتحكى تفاصيل ومواقف مختلفة بقدرة كبيرة بس ليس لديهم قدرة على فهم وتحديد المشكلة كانت ايه ؟ وده بجده  كثير فى العيادات الخاصة لما بيجلى ناس عشان تفضفض امل فى انها تجد حل لمشكلتها اللى هى مش عارفة تحددها اصلا، خصوصا فى المشاكل العاطفية، فتحديد اساس المشكلة صعب على اغلب الناس ، فليس الجميع سيفهم بسهولة ان مشكلتهم هى ارتباطهم بشخص نرجسى، أو انهم متورطين فى علاقة سامة، او ان عدم السعادة اللى حاسين بيها فى علاقاتهم الزوجية هى نتيجة اختزان مشاعر سلبية لفترات طويلة وان مشكلتهم ابسط من انها تتحل بالانفصال، ولو ركزنا مع الناس اللى عندها قدرة على انها تحدد المشكلة من غير ما تغرق فى دوامة التفاصيل  هى ناس عندها خلفية بعلم النفس والخلفية دى بتكون عندهم وعى بمشكلتهم وقدرة على تحديدها فى وقت قصير، وتحديد المشكلة بيختصر نص الوقت فى حلها ، تحديد المشكلة بيساعدنا نقرر نعمل ايه؟، المشكلة بسيطة واحاول احلها ، ولا مصلحتى انى انهى العلاقة.

 من كتاب زوجة رجل  نرجسى للدكتورة ريهام عصام  الدين